Już ino jednego punktu brakuje rezerwom Piasta, żeby awansować do A-klasy. Dzisiej Piast leko ogroł ostatni manszaft tabeli, Zimno Wódka 6-0, a Jaryszów ogroł na wyjeździe Kadłubiec 1-0. Piast mo dalyj 5 punktów przewagi, a do końca łostały ino dwa szpile. Musiołby sie chyba trefić jakiś cud, coby Jaryszów przeskoczół Szczelce, je to prawie niemożliwe i Piast mo awans już w kieszyni, szampan już idzie w lodówce chłodzić, na bez tydzień moge sie przidać jak nic.

Ciekawie je w grupie piyrszyj. Tam Jemielnica wygrała ze Grodziskiym 6-0 i boł to dlo niyj mus, bo w sobota Piotrówka wygrała w Kielczy 5-2 i na jedyn dziyń przeskoczoła Jemielnica w tabeli. Dzisiej zaś wszystko je w normie, ale Jemielnicy poli sie grunt pod nogami, bo prawie cofnyli jyj walkower za mecz z Piotrówkom i skuli tego Jemielnica mo ino punkt przewagi nad Piotrówkom. W tyj grupie idzie barzyj o ambicja niźli o sportowo złość, bo tak jak wszyndzie, jak grajom dwa manszafty, co majom do siebie 2 kilometry i som z tyj samyj gminy. Na naszym forum momy kupa dyskusji o walkowerach, przepisach, murzinach, a tak po prowdzie to idzie o to, wto na koniec bydzie lepszy i awansuje do A-klasy. Piotrówka moge sie to trocha brać na ludzie, bo to je ino rezerwa, dlo Jemielnicy sprawa je poważniejszo, bo idzie o piyrszo drużyna, a tak po prowdzie, ta dzisiejszo bundesliga to je nic inkszego jak staro C-klasa, wiync uciekać z niyj wyżyj drużynom, co majom konsek ambicji, je czysty mus.

Coby po równo boło, to jeszcze pora słów o grupie krapkowickiyj. Tukej bliko awansu som Racławiczki, wtore wygrały z Chorulom i majom 3 punkty przewago nad Krympnom, któro po remisie w Gogolinie chyba nie mo już szans na przegonienie Racławiczek. Strata 3 punktów niby jest do odrobiynia w dwóch meczach, ale już za tydzień Racławiczki mogom świyntować awans i ostatni szpil moge być ino łopietruszka.