No i doczekali my sie. Strzelecko Bundesliga zaś gro. Chyba ostatni roz w takim kształcie, bo od prziszłego roku podokryngów mo już nie być i wszystko bydzie prowadzioło Opole. Na razie jednak dalyj rzondzom Strzelce. Piyrsze szpile już za nami. Nojbarzyj wszyscy chyba czekali na nojwiynkszo synsacja tyj ligi, trzeci manszaft Piotrówki. Chyba żodny inkszy klub w Polsce niy mo zgłoszonych trzech drużyn seniorów - a Piotrówka mo.

Ta trzecio drużyna, niby nojsłabszo z nich, na poczontek nojwiynjcyj wygrała. We Zimnyj Wódce naszczylała aż 12 goli, a ino jedyn puścioła. Nie może być inaczyj, ino łostała piyrszym liderem. W tyj grupie zresztom inksze drużyny tyż fest szczylały. Stary Ujazd naklupoł Kalinowowi 7-0, a Zalesie rozniosło Kamionek 9-1. Olszowa wygrała 8-0 i nie popisała się ino Porymba, bo wcale nie zagrała i już piyrszy szpil puścioła walkowerym.

W piyrszyj grupie piyrszym liderem jest Izbicko, wtore wygrało 6-2 ze Staniszczoma. W trzeciyj grupie nojlepszy boł Kromołow - 5-1 ze Racławiczkami.