W pirszyj grupie momy zmiana lidera! Je nim tera Piotrówka, wtoro na kolyjka przed końcym przegonioła Jemielnica. Jemielnica w ostatnim szpilu zrymisowała we Szymiszowie 1-1 i stracioła dwa punkty. Piotrówka w tym samym czasie wygrała z Rożniontowym i mo tera punkt wiyncyj od Jemielnicy. To sie dopiyro porobioło. Kibice Piotrówki i Jemielnicy durch sie wadzom o walkowery s poczontku wiosny i do dzisiej nie umiom sie dogodać. Nie umiom tyż OZPN-y, bo jedne tyn walkower dowajom, a inksze cofinajom i wyglondo to trocha tak, jak swada kibiców, co kożdy sie na przepisach lepiyj zno, ino że kożdy po swojymu.
We Jemielnicy to na pewno musi być szok. Na tydziyń przed końcym stracić lidera, i to jeszcze na rzecz Piotrówki, to ciynżko rzecz, ale taki je już sport. Trza zacisnoć zymby i przetrzimać. Jeszcze sie szpile nie skończoły. Za niecołki tydziyń jeszcze jedna kolyjka i jedno, co je pewne, bydzie to kolyjka na miara finału Ligi Majstrów (wiadomo, w takim ciyńszym, powiatowym wydaniu). Brakowało by jeszcze ino, coby Jemielnica trefioła sie w niyj z Piotrówkom, ale tyn szpil już boł grany pryndzyj i łostanie nom patrzynie, jak oba manszafty korepsondencyjnie grajom o piyrszy plac. Piotrówka jedzie do Grodziska, a Jemielnica gro u siebie ze Sporokiym.
We drugiyj grupie awans wywalczoł Piast Szczelce, wtory wygroł w Porymbie 9-0 i już go Jaryszów nie przeskoczy. W trzeciyj zaś grupie awans wywalczoły Racławiczki, wtore we szpilu na szpicy wygrały w Krympnej 3-0 i załatwioły sprawa na tydziyń przed końcym.