Tydziyń tymu Piotrówka wygrała u siebie ze Jemielnicom, a terozki dostała smary od Krośnicy. Chyba prawie mieli ci, co godali, że to, jak gro Piotrówka, zależy od tego, wiela dostanom ludzi z piyrszego składu. Z Jemielnicom to bol szpil o prestiż, a tero już niy i przedostatnio w tabeli Krośnica łograła wicelidera. Jemielnica zaś wygrała ze Staniszczoma 3-0 i zaś mo sztyry punkty przewagi.
Trzeci je Kadłub, traci punkt do Piotrówki, a potym to dugo nic i na czwortym placu je Izbicko, ale już niy mo szans, coby dogonić Jemielnica.
W grupie drugiyj jak przecinak idzie rezerwa Piasta. Tero nie grała daleko, bo w Dziewkowicach, ale wygrała aż 6-1 i dalyj je liderym. Drugi je Jaryszów, wtory wygrol ze Zimnom Wodkom, a trzeci Kadłubiec, wtory wygrol z Błotnicom. I Jaryszów i Kadłubiec wygrali po 2-0.
We grupie Krapkowickiyj na przodku momy Krympna. W łostatnim szpilu wygrała ze Chorulom 1-0 - to maluczko wygrano, ale trzi punkty som i lider tyż. Drugie som Racławiczki ze stratom dwóch punktów do Krympnyj, a trzecie Żywocice. Żywocice wygrały w Gogolinie 3-1 i jeszcze nie stracioły szansy na awans, choć wygrać go bydzie bardzo ciynżko, strata do lidera to 6 punktów, a Racławiczki jeszcze majom jedyn szpil w zapasie.